بس ما فيش وقت ......

..بس ما فيش وقت
نفسي ادرس الكتاب المقدس بس مفيش وقت, نفسي اخد كورسات بس مفيش وقت, نفسي اواظب على الاجتماع بس مفيش وقت, نفسي اخرج اتفسح حبه بس مفيش وقت, نفسي اذاكر كويس السنه دي بس مفيش وقت, نفسي اقعد اصلي اطول شوية بس مفيش وقت, نفسي اكرز وابشر عن ربنا بس مفيش وقت, نفسي اعمل حاجات كتيرة بس مفيش وقت.
الوقت مشكلة كبيرة عند كتير فينا .. نفسنا نعمل حاجات كتيرة و وبنحلم احلام جميلة بس مش عارفين نجيبلها وقت منين .. وليه اليوم ميبقاش 36 ولا 48 ساعة بدل ماهو 24 ساعة بس؟ .. واكيد لو سالتك هل انت راض عن اللي عملته اوحققته خلال سنين حياتك اللي فاتت هتقول كان نفسي اعمل حاجات اكتر بس المشكلة في الوقت .. لكن الحقيقة اللي بتضيع مننا كتير وبتسرق مننا ايام وشهور ان جملة "بس مفيش وقت" مش مضبوطة ابدا .. لان بالفعل عندنا وقت
الحقيقة ان المشكلة مش في الوقت لكن في تنظيم الوقت .. المشكلة في كمية الوقت اللي بتضيع من ايدينا من غير استفادة .. وكمان ان في حاجات بتاخد وقت حاجات من غير أي ترتيب او اولويات.
هل فكرت مرة في رجال الله العظماء امثال موسي وداود ودانيال وغيرهم .. وازاي انهم مش متفرغين للعبادة وبس او رهبان في دير .. انما كانت حياتهم مليانه بالمسئوليات اللي محتاجة وقت .. فموسى كان قائد لشعب كبير كله طلبات وداود كان ملك ورجل حروب ودانيال كان وزير كبير في المملكة .. لكن كانوا ناجحين في جوانب حياتهم وكانوا بيقدروا يعملوا حاجات احنا مش قادرين نعملها – زي الصلاة وانتظار ربنا بالساعات زي ما كانوا بيعملوا- رغم اننا معندناش مشغولياتهم .. وده عشان قدروا يستغلوا كل وقتهم بافضل الصور
مش محتاجين نحسب حسابات عشان نشوف لو عمر الانسان 70 سنة, كام سنه بيقضيها منها بس في النوم وكام في الاكل وكام في الفرجة على التليفزيون وكام وكام وكام ......... لكن الاهم ان اسالك: كام مرة انت جيت في اول الشهر او اول الاسبوع او حتى اول اليوم وكتبت اللي نفسك تنجزه في الوقت ده؟
طبعا مش هو ده تنظيم الوقت لكن بس حاول تفكر وتعرف انت كام مرة قررت انك متضيعش وقت او تستغله كويس ومتبقاش ماشي في دنيتك كدة وخلاص انما كل حاجة تخطط وتنظم ليها فتقدر تنجز وتاخد افضل النتايج
وعليه .........
اول حاجة انك تعرف كويس ان اللي جاي اكتر بكتير من اللي فات .. وان كان ضاع منك وقت كتير في سنينك اللي فاتت مش لازم تقعد تندم على الوقت اللي ضاع في الهوا .. انما افضل بكتير انك تتعلم من اللي فات ده وتبص على الجاي بكل الوقت اللي ماليه وتصدق ان قدامك وقت كتير قوي تقدر تنظمه وتظبطه بافضل صورة .. عشان تقدر تنجز طموحاتك وتحقق كل احلامك سواء اللي حاولت فيها وفشلت او لسة محاولتش فيها ونفسك تحققها بجد.
تاني حاجة انك تخطط .. انك تدي كل حاجة وقتها اللي تستحقه ... الكلام ده مش جديد لان الحكيم قاله من زمان .. المهم وانت بتعمل كده انك تحط لكل حاجة وقت يعني مفيش حاجة مش مهمه او مش بالاهمية اننا نحط ليها وقت – زي المكالمات التليفونية او الوجبات الغذائية مثلاً .. مش بنحط ليها وقت رغم انها بتضيع وقت كبير مننا- لكن كل حاجة صغيرة او كبيرة لازم نخطط لها ونديها وقتها
تالت حاجة انك تقّيم بصورة دورية اللي انت خططته .. تشوف اللي انجزته ودرجة استفادتك بوقتك في الفترة دية .. بمعني انك لو انجزت كل اللي خططت ليه تحاول تكافئ نفسك باي صورة .. ولو مقدرتش تنجز اللي خططت ليه حاول تدور وتعرف لية كدة .. واية اهم اللي حاجات اللي ضيعت وقتك او اللي اخدت اكتر من وقتها .. ولازم تخرج بقرارات من تقييمك ده .. ولازم تثابر وتكمل محاولاتك لتنظيم وقتك
والاهم من انك تنظم وتدي لكل حاجة وقتها انك تاخد بالك من الوقت اللي بيقع بين الحاجات اللي قررت تعملها .. لو لقيت نفسك في وقت قاعد مش بتعمل حاجة قوم واعمل أي حاجة من الحاجات اللي متاخرة عليك لان الوقت ده مش ممكن تعويضه او توقيفه او حفظه او تمديده .. حاول تستغل كل دقيقة في يومك .. خليك دايما متاكد ان الدقيقة اللي بتعدي من حياتك مستحيل هترجع تاني .. فحاول انك تستغلها افضل استغلال
في الكلام اللي فات في كلمة غريبة واتكررت كتير "استغل" ... افتكرها كويس "استغل كل دقيقة في وقتك" .. ولو نسيت كل الكلام اللي فات افتكر بس الامر الكتابي "مفتدين الوقت لان الايام شريرة .. اف5 :16" .. واعرف ان الهدف الاسمي من كل الكلام ده انك تدرك القيمة الحقيقة للدقيقة وازاي انها راس مالك للايام الجاية ... وافتكر ان كل دقيقة في يوم جديد هي فرصة جديدة عشان "تحقق" و"تنجز" و"تبدع" لحياة افضل وافضل.

بس مفيش وقت بجد يا توتا مووضوع جامد وربنا يباركك
وياريت كلنا نقرا الكلام ده كويس واكيد هنحقق كل احلامنا طول ماحنا قريبين من ربنا
وبركة امنا ايرينى وبركات القديسين تكون مع جميعكم امين

ميرسي كتير استاذى العزيز فادى
ربنا يخليك للمنتدى يارب وتكبر فيه اكتر واكتر
ميرسي كتير لمرورك وردك

"استغل كل دقيقة في وقتك" ..

موضوع فوق الرائع يا توتا ربنا يباركك يارب